القاعدة الأولى:
لو عربيتك كبيرة أو قديمة، إستخدم المبدأ القانونى: اللى خايف على عربيته يوسع!!
ملحوظة: إبعد عن سكة العربيات المخرشمة ، بيسوقوا بنظرية ضربوا الأعور على عينه!!
القاعدة الثانية:
البوز بيز Booze Base: اللى يدخل ببوز عربيته الأول للتقاطع هو صاحب أولوية المرور!
إحرص على أن تكون صاحب أول بوز.
ملحوظة: لا تطبق الـ Booze Base مع أى لورى أو أتوبيس، حرصاً على بوزك لا مؤاخذة.
القاعدة الثالثة:
الإشارات تكشف نواياك للأعداء، إياك أن تستخدمها!
القاعدة الرابعة:
لا تترك مسافة للأمان بينك وبين السيارة التى أمامك فهذا له عدة مخاطر:
1- عربية ثانية حتملا الفراغ فى ثوانى و برضُه ما يبقاش فيه مسافة بينك وبين اللى قدامك، كل اللى كسبته إنك إتأخرت لورا شوية.
2- حتدى فرصة للعيال يعملوا غرز قدامك.
3- كل المشاة حيغمضوا عينيهم ويعدوا من الحتة دي.
4- اللى وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب -.
القاعدة الخامسة:
الإشارات مش معمولة علشان تنظم المرور، معمولة علشان الشكل يبقى متحضر بس!
ملحوظة: إعتمد على العساكر (مع تحملك كامل المسئولية لو واحد منهم شاورلك تعدى و بلدياته الناحية الثانية فتح السكة للورى) أو يفضل أن تستعمل البوز بيز (راجع القاعدة الثانية).
القاعدة السادسة:
إذا كنت مش واقف فى الصف الأول فى الإشارة أعمل حسابك تزمر بشكل متواصل وهستيري أول ما الإشارة تفتح، لأن الناس اللى قدام بيبقوا واقفين فى الإشارة من زمان و جايز جداً يكونوا ناموا!!
القاعدة السابعة:
معظم الحوادث تحدث فى التقاطعات أول الإشارة ما تحمر، كل ما عديت الإشارة الحمراء أسرع كل ما قلت فرصة إنك تتخبط!
القاعدة الثامنة:
الشارع مكان مقرف، سوق بأسرع ما يمكن حتى تتخلص من هذا الهم بسرعة، وميهمكش من الناس اللى ماشيين بالراحة لأنهم مرضى نفسيين بيستمتعوا بالعذاب، ويستاهلوا اللى يجرى لهم.
القاعدة التاسعة:
من حقوقك الدستورية أن تركن أمام باب المحل الذي تريد أن تشتري منه، وإذا سبقك واحد إبن ستين فى سبعين وركن قدام الباب، فمن حقك أن تقفل عليه وتركن صف ثانى أو ثالث، ومش مهم لو الشارع إتقفل، إيه يعنى أما الناس تتعطل عشر دقائق علشان تستمتع بحقوقك الدستورية؟ هيا يعنى الدنيا طارت ولا كان وراهم الديوان؟
القاعدة العاشرة:
من حقك أيضاً أن تخرج من مكان إنتظارك فى أى لحظة تشاء، إكسر الدركسيون شمال و إطلع، أى حد ماشى فى الشارع لازم يقف لك فوراً، (راجع البند السابق).
القاعدة الحادية عشر:
إحترس من ثلاث أنواع من السائقين بيسوقوا و كأنهم مش ممكن يموتوا:
1- العيال الروشين اللى بيلعبوا Computer Games وفاكريين إن ممكن يكسبوا Life زيادة لو ساقوا أسرع.
2- موتوسيكلات توصيل الطلبات) Home Delivery ).
3- سواقين الميكروباص.
ملحوظة: إوعى تحاول تثبت لحد منهم إن فكرته غلط. فاهمني!!!.
القاعدة الثانية عشر:
لما تشوف حادثة لازم تهدى وتتفرج -مش مهم تساعد-الحاجات دى دمها أخف من الأخبار المملة بتاعة التلفيزيون، وبعدين لما الطريق وراك يقف تحمى المجتمع من حادثة تانية.
القاعدة الثالثة عشر:
الكناسين لازم يحللوا اللقمة اللى بياكلوها، حاول تنفعهم وترمى أى حاجة من الشباك.
القاعدة الرابعة عشر:
لما تخلص سيجارة إوعى تحطها فى الطفاية، إرميها من الشباك أول ما تشوف واحد بموتوسيكل معدى جنبك (علشان يحرم يعمل غرز).
القاعدة الخامسة عشر:
من حقك أن تعبر الشارع فى أى وقت ومن أى مكان.
القاعدة السادسة عشر:
إذا كان هناك سيارة قادمة أعمل نفسك مش واخد بالك وعدى براحتك خالص،ما تخافش، هوا حيقف، هو أهبل يدوسك و يودى نفسه فى داهية؟
القاعدة السابعة عشر:
إياك أن تنظر نحو السيارات القادمة، أعبر الطريق وظهرك لها حتى لا يشك أحد قائدى السيارات إنك شايفه ويحاول يخوفك علشان تقف إنت.
القاعدة الثامنة عشر:
حتى لو شفته إوعى تخاف -خصوصاً لو معاك بنت- تبقى راجل ملو هدومك وتخاف من حتة عربية؟ عرض قفاك وسيبه يتفلق.
القاعدة التاسعة عشر:
الرصيف ليس للمشاه، بل لركن السيارات و فرشات الباعة الجائلين و المحلات... إلخ
لذلك يحق للمشاه السير فى وسط الشارع، لمزيد من الأمان، راجع القاعدة السابقة.
القاعدة العشرين:
إذا كان الماشى من فئة النقل الثقيل، فمن أبسط حقوقه إنه يمشى على أقل من مهله و يتهز براحته. واللى مش عاجبه الهز يدور على لورى يخبطه...
الرئيسية 
البوابة 
أحدث الصور 
التسجيل 
دخول 
الخميس مارس 13, 2008 10:25 pm
